Деновиве од печат излезе првата поетска книга „Парчиња од себеси“ од младата авторка и поетеса Викторија Стојовска. Таа во своето дело, кое е склоп на прозни дела, кратки дијалози и кратки приказни инспирирани од реалноста, раскажува за сето она што се сака, што ранува и лекува, што се носи длабоко во душата.
Книгата, која е дел од Современата македонска книжевност и едицијата „Книжевни меридијани“, е носител на наградата „Душата на чаршијата“, на конкурсот распишан од издавачката куќа „Дата песнопој“ од Битола. Во себе содржи дела напишани низ подолг временски период, а секој расказ е посебен и носи своја приказна и поука, иако се неповрзани и различни во едно нешто се слични: да допрат до сечие срце.
Авторката им посакува на читателите да уживаат во читањето на нејзиното дело, напишано со чиста искреност и емоција, во кое со сигурност ќе се пронајде секој од вас. А наскоро се очекува да има и официјална промоција, каде што ќе можеме да се дружиме со авторката и да добиеме примерок од книгата. За информациите околу неа ќе бидете дополнително известени.
